ریاض(این این آئی) نگران وزیر برائے مذہبی امور انیق احمد نے سعودی عرب کے وزیر حج و عمرہ ڈاکٹر توفیق الربیعہ سے اگلے سال کے لیے حج انتظامات پر تبادلہ خیال کیا۔ انیق احمد نے ان سے درخواست کی کہ وہ پاکستانی حجاج کو ان مقامات کے قریب رہائش دیں جہاں سالانہ مناسکِ حج ادا کیے جاتے ہیں۔عرب ٹی وی کے مطابق وزیر مذہبی امور اس وقت مملکت کے ایک ہفتے کے دورے پر ہیں جہاں انہوں نے سینئر سعودی حکام سے ملاقاتیں کی ہیں تاکہ پاکستانی زائرین کے سفر کو مزید آسان بنانے کے لیے مکہ روٹ انیشی ایٹو کو اسلام آباد سے آگے بڑھانے کے امکانات تلاش کیے جائیں۔انہوں نے سعودی وزیر کے ساتھ گفتگو کے بعد کہا کہ مملکت نے آئندہ سال حج کے خواہشمند پاکستانیوں کے لیے سہولیات بڑھانے پر اتفاق کیا ہے۔
