اسلام آباد (این این آئی)نگران وزیرداخلہ سرفراز بگٹی نے کہا ہے کہ شہدا ہمارا قیمتی اثاثہ ہیں جنہوں نے اپنا آج ہمارے کل پر قربان کردیا،اسلام آباد پولیس کو جدید تکنیکی صلاحیتوں سے لیس کیا جائیگا،ریاست کی بالا دستی کو ہرصورت قائم رکھا جائے گا۔وہ منگل کو اسلام آباد پولیس لائن ہیڈکوارٹر کے دورہ کے موقع پر گفتگوکررہے تھے۔ اس موقع پر سیکرٹری داخلہ آفتاب اکبر درانی، آئی سی سی پی او ڈاکٹر اکبر ناصر خاں نے استقبال کیا۔وزیرِ داخلہ نے یادگار شہدا پر حاضری دی، پھول چڑھائے اور فاتحہ خوانی کی۔وزیرِ داخلہ نے سنٹرل پولیس آفس کا دورہ کیا اور خواتین ڈرائیونگ سنٹر کا بھی افتتاح کیا۔اس موقع پر وزیرِ داخلہ کوافسران کے ساتھ ملاقات میں تفصیلی بریفنگ دی گئی۔آئی سی سی پی او نے وزارت داخلہ کا ہرسطح پر اسلام آباد پولیس سے تعاون پر شکریہ ادا کیا۔آئی سی سی پی او نے وزیر داخلہ کو اسلام آباد پولیس کی کامیابیوں اور اقدامات کے متعلق آگاہ کیا۔آئی سی سی پی او نے اسلام آباد میں جرائم کے حوالے سے بھی بریفنگ د ی اور کہا کہ رواں سال گزشتہ سال کی نسبت کرائم میں کمی واقع ہوئی۔اسلام آباد پولیس منشیات کے خلاف بھرپور مہم چلا رہی ہے،غیرقانونی رہائش پذیر غیرملکیوں کی ملک بدری کا پلان زیر بحث لایا گیا۔وزیر داخلہ نے اسلام آباد پولیس کو گزشتہ سال اسلام آباد میں امن و عامہ کی صورتحال کو پرامن طریقہ سے نمٹانے پر شاباش دی۔تمام افسران جوانمردی اور دل لگی سے فرائض ادا کریں۔ ریاست کی بالا دستی کو ہرصورت قائم رکھا جائے گا۔ تمام افسران شہریوں سے شائستہ رویہ اپنائیں اور ان کے مسائل کو حل کریں۔
