سرگودھا(این این آئی)مسلم لیگ (ن)کی نائب صدر مریم نواز شریف کی اپیکا پنجاب کو مطالبات پورے کروانے کی یقین دہانی اور اسیران کی رہائی پر اساتذہ سمیت سرکاری ملازمین نے کئی روز سے جاری ہڑتال اور احتجاج ختم کر دیا جس سے تمام سرکاری سکولوں اور محکموں میں معمول کے مطابق کام شروع ہو گیا۔تفصیلات کے مطابق اپیکا پنجاب کی کال پر اپنے مطالبات کے حق میں اساتذہ سمیت سرکاری ملازم کئی روز سے ہڑتال کے ساتھ احتجاج پر رہے جس سے تعلیم سمیت سرکاری امور ٹھپ ہو کر رہ گئے۔دو روز سے اپیکا کے قائدین کے وفد نے ملک احمد خان سابق مشیر وزیر اعظم پاکستان سے اپنے چارٹر آف ڈیمانڈز کے لئے رابطہ سے مسلم لیگ ن کی نائب صدر مریم نواز سے جاتی عمرہ میں طویل ملاقات کر کے انہیں پنجاب کے ملازمین کے ساتھ ہونے والی ناانصافیوں کے بارے میں آگاہ کیاجس پر مریم نواز نے وفد کولیو انکیشمنٹ کا نوٹیفکیشن واپس کروانے پینشن اور گریجویٹی میں کسی قسم کی کوئی کمی نہ ہونے دینے اوردیگر مطالبات کی منظوری کے لئے اعلیٰ سطح کی کمیٹی تشکیل دے کر اس پر عمل درآمد کروانے کا یقین دلایا اور ہڑتال ختم کرنے کی استدعا کی جبکہ عدالت کے حکم پر تمام اسیران کو بھی رہا کر دیا گیا جس پر اساتذہ سمیت سرکاری ملازمین ہڑتال اور احتجاج ختم کر کے دفاتر اور سرکاری سکولوں میں دفاتری امور پر کام شروع کر دیا۔
