اسلام آباد(این این آئی)چین اور پاکستان کے درمیان تعاون کے تحت گوادر پورٹ پرمحکمہ موسمیات کا نیا نگران اسٹیشن تعمیر کیا جائے گا ، نئے موسمیاتی آلات کی کھیپ خنجراب پاس کے ذریعے گوادر روانہ کر دی گئی۔ گوادر پرو کے مطابق چین کے محکمہ موسمیات (سی ایم اے) نے کہا ہے کہ توقع ہے کہ اکتوبر کے آخر تک چین اور پاکستان کے درمیان تعاون کے تحت محکمہ موسمیات کا نیا نگران اسٹیشن گوادر پورٹ پر تعمیر کیا جائیگا ، انہوں نے مزید کہا کہ حال ہی میں نئے موسمیاتی آلات کی ایک کھیپ خنجراب پاس کے ذریعے پہلے ہی گوادر بندرگاہ پاکستان روانہ کی جاچکی ہے۔ خنجراب، چین کے سنکیانگ اویغور خود مختار علاقہ میں دونوں ممالک کو عبور کرنے والی ایک اہم زمینی سرحد ہے۔ گوادر پرو کے مطابق اس سے نہ صرف بی آر آئی کے شراکت دار ممالک اور خطوں کی موسمیاتی نگرانی کی صلاحیت کو بڑھانے میں مدد ملے گی بلکہ انہیں طوفانوں اور دیگر تباہ کن موسم کی نگرانی اور پیشگی انتباہ کی صلاحیت کو بہتر بنانے میں بھی مدد ملے گی اور آفات کی روک تھام اور تخفیف کے لئے فیصلہ سازی میں مدد ملے گی۔ گوادر پرو کے مطابق چین اور پاکستان عالمی موسمیاتی تنظیم(ڈبلیو ایم او) ریجنل ایسوسی ایشن ٹو کے اہم رکن ہیں۔ ایشیا میں موسمیاتی ترقی کے لئے دونوں ممالک کے درمیان باہمی تعاون انتہائی اہمیت کا حامل ہے۔
