اسلام آباد (این این آئی)نگران وفاقی وزیر اطلاعات و نشریات مرتضی سولنگی نے سپریم کورٹ بار ایسوسی ایشن کے سالانہ انتخابات میں نومنتخب عہدیداران کو مبارکباد دیتے ہوئے کہا ہے کہ وکلا جمہوریت، انسانی حقوق اور آئین کے محافظ ہیں، قانون کی حکمرانی، آئین کی بالادستی اور جمہوری روایات کے فروغ میں وکلا کا روشن کردار تاریخ کا حصہ ہے۔ بدھ کو اپنے تہنیتی پیغام میں نگران وفاقی وزیر اطلاعات نے سپریم کورٹ بار ایسوسی ایشن کے نومنتخب صدر شہزاد شوکت، سیکرٹری علی عمران سید سمیت دیگر عہدیداران کو مبارکباد دی۔ انہوں نے کہا کہ انصاف کے بغیر ترقی یافتہ معاشرے کا قیام ممکن نہیں۔ انہوں نے کہا کہ وکلا بار اور بینچ کے درمیان پل کا کردار ادا کرتے ہیں۔ نومنتخب عہدیداران آئین کی بالادستی اور قانون کی حکمرانی کے لئے اپنا کلیدی کردار ادا کرتے رہیں گے۔ انہوں نے امید ظاہر کی کہ سپریم کورٹ بار کا فاتح پینل وکلا برادری کے مسائل کے حل سمیت اہم عدالتی معاملات میں مثبت اور موثر کردار ادا کرے گا۔
