اسلام آ باد(این این آئی)پاکستان کی ڈینٹل اور سرجیکل آلات کی صنعت کے لیے اہم سنگ میل کی حیثیت ، ملک کے ایک معروف ادارے نے پہلی بار چائنا انٹرنیشنل امپورٹ ایکسپو(سی آئی آئی ای)میں اپنی مصنوعات کی نمائش کی۔5 نومبر سے 10 نومبر تک شنگھائی میں منعقد ہونے والی ایس نمائش نے پاکستانی کمپنی کو چینی اور بین الاقوامی مارکیٹوں کی بے پناہ صلاحیتوں سے فائدہ اٹھانے کے لئے ایک منفرد پلیٹ فارم فراہم کیا ۔گوادر پرو کے مطابق سیالکوٹ سے تعلق رکھنے والے این جے انٹرپرائزز کے مالک عاکف جاوید بٹ نے اس پروقار تقریب میں اپنی مصنوعات کی نمائش کے موقع پر خوشی کا اظہار کیا۔ انہوں نے کہا کہ چین صحت کی دیکھ بھال سمیت مختلف صنعتوں میں عالمی رہنما کے طور پر ابھرا ہے۔ 2006 میں قیام کے بعد سے، ہم نے امریکہ، جرمنی، آسٹریلیا، وغیرہ کو برآمد کیا ہے. سی آئی آئی ای میں شرکت کرکے ہمارا مقصد چینی مارکیٹ کی وسیع صلاحیت سے فائدہ اٹھانا اور چینی کمپنیوں کے ساتھ مضبوط شراکت داری قائم کرنا ہے۔ گوادر پرو کے مطابق اعلی معیار کے ڈینٹل، سرجیکل، تشخیصی، آرتھوپیڈک، کاسمیٹک اور سرجیکل آلات کے لیے مشہور پاکستانی انٹرپرائز نے ایکسپو میں نمایاں توجہ حاصل کی۔ نمائش پر مصنوعات کی ایک وسیع رینج کے ساتھ، کمپنی کا مقصد خود کو چینی مارکیٹ میں ایک قابل اعتماد اور مسابقتی کھلاڑی کے طور پر قائم کرنا ہے. گوادر پرو کے مطابق سی آئی آئی ای، جو بین الاقوامی تجارت اور تعاون پر اپنی توجہ مرکوز کرنے کے لئے جانی جاتی ہے نے دنیا بھر سے متعدد نمائش کنندگان کو اپنی طرف متوجہ کیا۔ اس تقریب میں پاکستانی انٹرپرائز کی شرکت پاکستان اور چین کے درمیان دوطرفہ تجارت خاص طور پر صحت کی دیکھ بھال کے آلات کے شعبے میں بڑھانے کی جانب ایک اہم قدم ہے ۔ گوادر پرو کے مطابق انٹرپرائز نے اس سال چین میں مصنوعات کی چھ بڑی اقسام کو رجسٹر کیا ہے۔ عاکف جاوید چینی مارکیٹ کی وسیع صلاحیت سے فائدہ اٹھانے کے لئے پراعتماد ہیں کیونکہ ان کی مصنوعات پہلے ہی چینی صحت کی دیکھ بھال کے شعبے کے سخت معیار اور ضروریات کو پورا کرتی ہیں۔ گوادر پرو کے مطابق پاکستان کی ڈینٹل اور سرجیکل انسٹرومنٹ انڈسٹری نے اپنی اعلی معیار کی مصنوعات اور مسابقتی قیمتوں کی وجہ سے شہرت حاصل کی ہے۔ چین میں صحت کی دیکھ بھال کے آلات کی بڑھتی ہوئی طلب کے ساتھ ، پاکستانی انٹرپرائز کا مقصد چینی مارکیٹ کی بڑھتی ہوئی ضروریات کو پورا کرنے کے لئے اپنی مہارت اور تجربے سے فائدہ اٹھانا ہے۔ گوادر پرو کے مطابق ایکسپو کے دوران پاکستانی کمپنی ممکنہ چینی شراکت داروں، ڈسٹری بیوٹرز اور خریداروں کے ساتھ مفید بات چیت میں مصروف رہی۔ پاکستانی انٹرپرائز چینی مارکیٹ کی صلاحیتوں سے فائدہ اٹھانے کے لئے امید کے ایک نئے احساس اور عزم کے ساتھ پاکستان میں واپس آئے گا۔ مستقبل میں وہ ہر سال 5 سے 6 صنعتی نمائشوں میں شرکت کے لئے چین آنے کا ارادہ رکھتا ہے۔
