لاہور( این این آئی) نگران وزیر اعلیٰ پنجاب محسن رضا نقوی نے صوبائی دارالحکومت لاہور کے لبرٹی اور میو ہسپتال میں پولیس خدمت مراکز کا دورہ کیا۔محسن رضا نقوی کے دورہ کے موقع پر پولیس خدمت مراکز میں شہریوں کا رش تھا، نگران وزیر اعلی پنجاب نے شہریوں سے لائسنس بنوانے کے حوالے سے سوالات کیے جبکہ شہریوں نے محسن رضا نقوی کو ٹیسٹ کے عمل میں تاخیر کے حوالے سے شکایات کیں۔نگران وزیر اعلی نے خدمت مرکز کے انچارج سے استفسار کیا کہ ٹیسٹ میں 3سے 4گھنٹے کیوں لگ رہے ہیں؟ ۔محسن رضا نقوی نے کہا کہ ٹیسٹ کم سے کم وقت میں مکمل ہونا چاہیے، ٹیسٹ سسٹم بہتر بنانے کے لئے پنجاب انفارمیشن ٹیکنالوجی بورڈ سے رابطہ کیا جائے۔محسن رضا نقوی نے میو ہسپتال پولیس خدمت مرکز میں کائونٹرز پر عملہ بڑھانے کی ہدایت کی جبکہ لبرٹی پولیس خدمت مرکز میں شہریوں کے لائسنس بنانے کے عمل پر اطمینان کا اظہار کیا گیا۔
