کراچی(این این آئی)رواں سال پاک چین اقتصادی راہداری منصوبے کے آغاز کی 10ویں سالگرہ منائی جارہی ہے۔ کراچی میں چینی قونصل جنرل یانگ یون ڈونگ نے کہا کہ مجھے امید ہے کہ سی آئی یو کے مزید باصلاحیت افراد کو تربیت دے گا جو چین اور پاکستان کی ثقافت سے واقف ہیں اور سی پیک کی اعلیٰ معیار کی ترقی اور مختلف شعبوں میں دونوں ممالک کے درمیان تعاون میں فعال طور پر حصہ لے سکتے ہیں۔ جامعہ کراچی میں کنفیوشس انسٹی ٹیوٹ کی دسویں سالگرہ کی تقریبات اور ترقیاتی سیمینار سے خطاب کرتے ہوئے قونصل جنرل نے سی آئی یو کے کی جانب سے کی جانے والی فعال چینی تدریسی اور ثقافتی سرگرمیوں کی توثیق کی جنہوں نے چینی ثقافت کے فروغ اور چین اور پاکستان کے درمیان دوستی میں اہم کردار ادا کیا ہے۔ گوادر پرو کے مطابق اس موقع پر جامعہ کراچی کے وائس چانسلر پروفیسر ڈاکٹر خالد محمود عراق نے گزشتہ دہائی کے دوران سی آئی یو کے کی شاندار کامیابیوں کو سراہا۔ انہوں نے کہا کہ 22 پروگرام پاک چین تعلیمی تعاون کا نمونہ ہے جس نے پاک چین ثقافتی اور عوامی سطح پر تبادلوں میں روح پھونک دی ہے۔ انہوں نے کہا کہ جامعہ کراچی اگلے اہم عشرے کے آغاز کے لیے کنفیوشس انسٹی ٹیوٹ کی ترقی کی بھرپور حمایت کرے گی۔ کراچی یونیورسٹی کے 100 سے زائد عہدیداران، فیکلٹی اور طلبا نے آن لائن اور آف لائن تقریب میں شرکت کی۔
