لاہور ( این این آئی) انسداد دہشت گردی عدالت نے سابق وفاقی وزیر و پاکستان مسلم لیگ (ن) کی مرکزی سیکرٹری اطلاعات مریم اورنگزیب کے وارنٹ گرفتاری منسوخ کر دیئے ۔ لاہور کی انسداد دہشت گردی عدالت میں جج عبہر گل نے مسلم لیگ (ن) کی رہنما اور سابق وفاقی وزیر اطلاعات مریم اورنگزیب اور سابق وفاقی وزیر جاوید لطیف کے خلاف انتشار انگیز گفتگو کرنے کے مقدمے کی سماعت کی جہاں مریم اورنگزیب عدالت میں پیش ہوئیں۔تھانہ گرین ٹایون پولیس نے مریم اورنگزیب کے خلاف 2022 میں مقدمہ درج کیا تھا۔عدالت نے بریت کی درخواست پر پراسکیوشن سے دلائل طلب کر لئے۔جبکہ شریک ملزمان سے متعلق اسلام آباد ہائیکورٹ کا تحریری فیصلہ پیش کرنے کی ہدایت کردی جبکہ مریم اورنگزیب کے عدالت میں پیش ہونے کے بعد ان کے وارنٹ گرفتاری منسوخ کر دیئے ۔بعد ازاں عدالت نے کیس کی سماعت 6 جنوری تک ملتوی کردی۔واضح رہے کہ ملزمان کے خلاف تھانہ گرین ٹائون پولیس نے 2022 ء میں مقدمہ درج کر رکھا ہے جبکہ عدالت نے ان کے وارنٹ گرفتاری جاری کئے تھے۔
