لاہور ( این این آئی) لاہور کی انسداد دہشت گردی عدالت نے 9 مئی کو جلائو گھیرائو کے مقدمات میں بانی چیئرمین پاکستان تحریک انصاف کی دونوں بہنوں، سابق رہنما اسد عمر اور دیگر ملزمان کی عبوری ضمانت میں 9 جنوری تک توسیع کردی۔انسدادِ دہشت گردی عدالت کے جج ارشد جاوید نے عبوری ضمانتوں پر سماعت کی۔شاہ محمود قریشی کے بیٹے زین قریشی اور سابق چیئرمین پی ٹی آئی کی بہنیں عبوری ضمانت کی معیاد ختم ہونے پر عدالت میں پیش ہوئیں۔جبکہ عدالت میں اسد عمرکے وکیل نے حاضری معافی کی درخواست دائر کی جسے عدالت نے منظور کر لیا ۔ملزمان کے وکیل رانا مدثر عمرنے عدالت میں موقف اختیار کیا کہ یہ محض سیاسی مقدمات ہیں جن میں درخواست گزار کے خلاف کچھ ثبوت نہیں ، عدالت سے استدعا ہے کہ آئندہ تاریخ پر پراسیکیوشن کو ریکارڈ پیش کرنے کا حکم دے ۔تفتیشی افسر نے عدالت کو بتایا کہ ملزمان کی تفتیش نامکمل ہے۔عدالت نے تمام ملزمان کو کل ( پیر ) کو 4 بجے مشترکہ تحقیقاتی ٹیم (جے آئی ٹی) کے روبرو پیش ہونے کی ہدایت کر دی۔بعد ازاں عدالت نے وکلا کو حتمی دلائل کے لیے طلب کر تے ہوئے اسد عمر ، عظمی خان ۔علیمہ خان سمیت دیگر کی عبوری ضمانتوں میں 9 جنوری تک توسیع کر دی۔ملزمان کے خلاف جناح ہائوس اور عسکری ٹاور سمیت دیگر کے خلاف جلائو گھیرائو کے مقدمات درج ہیں۔
