اسلام آباد (این این آئی)وفاقی وزیر اطلاعات سینیٹر شبلی فراز نے کہا ہے کہ بھارت اورقابض بھارتی فوج کو کٹہرے میں کھڑا کرنے کیلئے عملی اقدامات کرنا ہوں گے۔ ٹوئٹر پر اپنے بیان میں انہوںنے کہاکہ دنیا بھر میں انسانی حقوق کاعالمی دن مناتے ہوئے اسکے علمبرداروں کو وادی جنت نظیر میں بیگناہ انسانوں سے روا بدترین مظالم،اور ان کے بنیادی حقوق کی سنگین ترین پامالیوں کا نہ صرف فوری نوٹس لینا چاہیے بلکہ بھارت اورقابض بھارتی فوج کو کٹہرے میں کھڑا کرنے کیلئے عملی اقدامات کرنا ہوں گے۔انہوںنے کہاکہ مقبوضہ جموں کشمیر 5اگست 2019 سے دنیا کی سب سے بڑی جیل کا منظر پیش کر رہا ہے، خواتین’بچے’بزرگ اپنے ہی گھروں میں قید ہیں،کمیونیکیشن بلیک آؤٹ اورسخت ترین قدغنیں عائد ہیں۔انسانیت کیخلاف بھارتی جرائم رکواکر اورکشمیریوں کے بنیادی حقوق کے تحفظ سے ہی اس دن کی عالمی ساکھ بڑھائی جاسکتی ہے۔
