اسلام آباد (این این آئی)نگران وفاقی وزیر تجارت وصنعت ڈاکٹر گوہر اعجاز نے کہا ہے کہ چین اور پاکستان کے صنعت کاروں کے درمیان معاہدہ سے پاکستان کی ٹیکسٹائل کی صنعت کیلئے ترقی کے نئے دروازے کھلیں گے اور برآمدات میں مزید اضافہ ہوگا۔ یہ بات انہوں نے جمعہ کو چین میںچائنا پاکستان ٹیکسٹائل اینڈ اپیرل ایگزیکٹو سمٹ کے موقع پر آل پاکستان ٹیکسٹائل ملز ایسوسی ایشن اور چائنا چیمبر آف کامرس آف امپورٹ اینڈ ایکسپورٹ اف ٹیکسٹائل کے درمیان ہونے والے معاہدے کے موقع پر کہی۔انہوں نے کا کہا کہ اس معاہدے سے چین پاکستان اقتصادی راہداری (سی پیک )کے لیے پاکستان کے غیر متزلزل عزم کی نشاندہی ہو رہی ہے۔ انہوں نے کہاکہ معاہدے سے پاکستان اور چین کے درمیان اسٹریٹجک اقتصادی شراکت داری کو مزید تقویت ملے گی۔ وفاقی وزیر نے کہا کہ چین پاکستان کا آزمودہ دوست ہے اور دونوں ممالک کے درمیان مختلف شعبوں میں تعاون کے فروغ سے باہمی تعقات مزیدمضبوط ہونگے۔
