اسلام آباد(این این آئی)پاکستان مسلم لیگ(ن)کے قائدنواز شریف نے کہا ہے کہ طویل جلا وطنی کے بعد قومی اسمبلی میں واپسی پر جذباتی کیفیت ہے،اپنے گھر واپسی اور پارلیمنٹ میں حلف اٹھانے پر بے حد خوشی ہے۔انہوں نے ان خیالات کا اظہار جمعرات کو قومی اسمبلی میں منتخب رکن قومی اسمبلی کا حلف اٹھانے کے بعد گیٹ نمبر پانچ سے واپسی کے موقع پر میڈیا سے غیر رسمی بات چیت کرتے ہوئے کیا۔سابق وزیراعظم نواز شریف نے کہا کہ ملک کو سنگین چیلنجز کا سامنا ہے ،اس وقت سب کو مل کر ملک اور قوم کو مشکلات سے نکالنے کیلئے کوششیں کرنا ہوں گی۔صحافی کے ایک سوال پر نواز شریف نے جذباتی انداز میں کہا کہ ایک طویل عرصے کی جلا وطنی کے بعد اسمبلی کے رکن کا حلف اٹھانا میرے لیے باعث مسرت ہے۔انہوں نے کہا کہ یہ موقع میرے لیے خوشی اور جذباتی کیفیت کا ہے،میں ملک و قوم کی خدمت کیلئے پر عزم ہوں ،پاکستان کو معاشی طور پر مستحکم بنانے کیلئے بھر پور اقدامات کریں گے۔
