اسلام آباد (این این آئی)وزارت عظمیٰ کیلئے کاغذاتِ نامزدگی ہفتہ کو دوپہر 2 بجے تک قومی اسمبلی سیکریٹریٹ کے شعبہ قانون سازی سے وصول کیے گئے ،اتحادی جماعتوں کی جانب سے صدر مسلم لیگ (ن) شہباز شریف جبکہ تحریک انصاف کی جانب سے عمر ایوب وزیراعظم کے امیدوار ہیں اس سلسلے میں اتحادیوں میں کلیدی حیثیت رکھنے والی جماعت پیپلزپارٹی نے شہباز شریف کو ووٹ دینے کا اعلان کیا ہوا ہے۔ادھر مسلم لیگ (ن) اور متحدہ قومی موومنٹ (ایم کیوایم) پاکستان کے درمیان 3 نکاتی معاہدے کے پیش نظر متحدہ قیادت نے وزارتِ عظمیٰ کیلئے شہباز شریف کی حمایت کا فیصلہ کیا ہے۔وزارتِ عظمیٰ کے ووٹ کے لیے مسلم لیگ (ن) کی جانب سے سربراہ جمعیت علمائے اسلام (ف) مولانا فضل الرحمن کو منانے کی کوششیں جاری ہیں تاہم رہنماجے یو آئی (ف) کامران مرتضیٰ کے مطابق مولانا فضل الرحمٰن نے نوازشریف کو واضح کردیا کہ وہ اپوزیشن میں بیٹھیں گے۔
