اسلام آباد (این این آئی)قومی اسمبلی کااجلاس (کل)اتوار کو گیارہ بجے ہوگا جس میں نئے وزیر اعظم کا انتخاب کیا جائیگا ،تفصیلات کے مطابق وزارت عظمیٰ کیلئے کاغذاتِ نامزدگی ہفتہ کو دوپہر 2 بجے تک قومی اسمبلی سیکرٹریٹ کے شعبہ قانون سازی سے وصول کیے گئے ،اتحادی جماعتوں کی جانب سے صدر مسلم لیگ (ن) شہباز شریف جبکہ تحریک انصاف کی جانب سے عمر ایوب وزیراعظم کے امیدوار ہیں اس سلسلے میں اتحادیوں میں کلیدی حیثیت رکھنے والی جماعت پیپلزپارٹی نے شہباز شریف کو ووٹ دینے کا اعلان کیا ہوا ہے۔ادھر مسلم لیگ (ن) اور متحدہ قومی موومنٹ (ایم کیوایم) پاکستان کے درمیان 3 نکاتی معاہدے کے پیش نظر متحدہ قیادت نے وزارتِ عظمیٰ کیلئے شہباز شریف کی حمایت کا فیصلہ کیا ہے۔نئے وزیر اعظم کے انتخاب کیلئے قومی اسمبلی کااجلاس (آج)اتوار کو گیارہ بجے ہوگا جس کی صدارت اسپیکر قومی اسمبلی سر دار ایاز صادق کرینگے ۔ گزشتہ روز کے اجلاس میں اسپیکر سر دار ایاز صادق اور ڈپٹی اسپیکر سید غلام مصطفی شاہ منتخب ہوئے تھے ۔
