لاہور( این این آئی)لاہور ہایکورٹ نے سابق وزیر اعلیٰ پنجاب چودھری پرویز الٰہی کو کیس سے ڈسچارج کرنے کے فیصلے کو کالعدم قرار دینے کے خلاف اپیل پر سماعت اگلے ہفتے تک ملتوی کردی ۔لاہور ہائیکورٹ کے جسٹس شہرام سرور چوہدری کی سربراہی میں ڈویژن بنچ نے سماعت کی۔دوران سماعت ایڈووکیٹ جنرل پنجاب خالد اسحاق اور درخواست گزار کے وکیل نے تیاری کے لیے مہلت مانگی جسے عدالت نے تسلیم کرتے ہوئے فریقین کے وکلا ء کو تیاری کیلئے مہلت دے دی۔ اپیل میں موقف اپنایا گیا کہ سنگل بنچ کا فیصلہ قانون کے برعکس ہے۔جوڈیشل مجسٹریٹ کو اختیار ہے کہ وہ شواہد نہ ہونے پر کسی ملزم کو مقدمہ سے ڈسچارج کر سکے۔سنگل بنچ نے جوڈیشل مجسٹریٹ کا فیصلہ بے بنیاد کالعدم قرار دیا۔سنگل بنچ کادوبارہ جسمانی ریمانڈ کے لیے پیش کرنے کافیصلہ کالعدم قرار دیاجائے۔گوجرانوالہ اینٹی کرپشن کے مقدمہ میں جوڈیشل مجسٹریٹ نے پرویز الٰہی کو مقدمہ سے ڈسچارج کر دیا تھا۔
