لاس اینجلس (این این آئی)معروف امریکی گلوکارہ میڈونا نے غلط فہمی کا شکار ہوکر مداح کو ڈانٹ دیا۔غیرملکی میڈیا کے مطابق امریکی شہر لاس اینجلس میں ایک کانسرٹ کے دوران مداح کو بیٹھا دیکھ کر میڈونا غصے میں آگئیں جس کے بعد انہوں نے اس پر چلاّنا شروع کردیا۔رپورٹس کے مطابق گلوکارہ نے اسٹیج سے مداحوں کی بھیڑ میں موجود ایک مداح کی طرف اشارہ کرتے ہوئے چیخ کر کہا کہ تم وہاں بیٹھ کر کیا کر رہے ہو؟، بیٹھ کر کیا کر رہے ہو؟غیرملکی میڈیا کے مطابق 65 سالہ میڈونا کو کچھ ہی دیر میں احساس ہوگیا کہ وہ شخص وہیل چیئر پر بیٹھا ہوا ہے جس کے بعد انہوں نے اسٹیج کے کونے پر آکر معافی مانگی اور کہا کہ مجھے خوشی ہے کہ آپ یہاں ہو۔رپورٹس کے مطابق گلوکارہ کے معافی مانگنے کے باوجود انٹرنیٹ پر صارفین انہیں تنقید کا نشانہ بنا رہے ہیں۔
