عوام کو ریلیف دینے کیلئے ہر ممکن اقدامات اٹھائے جارہے ہیں’ سیف الملوک کھوکھر

0
168

لاہور( این این آئی)پاکستان مسلم لیگ (ن) لاہور کے صدر وممبر قومی اسمبلی ملک سیف الملوک کھوکھر نے کہا ہے کہ وزیر اعلیٰ پنجاب مریم نواز شریف عوام سے کیے گئے وعدوں کی تکمیل کے لئے دن رات کوشاں ہیں اور دعویٰ ہے پانچ سال بعد مثالی وزیراعلی ثابت ہوںگی ، معاشی مشکلات کے باوجود عوام کو ریلیف دینے کیلئے ہر ممکن اقدامات اٹھائے جارہے ہیں ۔اپنے بیان میں انہوں نے کہا کہ وزیر اعلیٰ پنجاب مریم نواز مسلم لیگ (ن) کے قائد نواز شریف اور وزیر اعظم شہباز شریف کی خدمت کی میراث کو آگے لے کر بڑھ رہی ہیں ،طلبہ کو اپنی سواری کی سہولت دینے کے لئے رجسٹریشن کا عمل شروع کر دیا گیا ہے اور حکومت والدین کا بوجھ بانٹنے کے لئے ایک ارب روپے کی سبسڈی دے گی ،اسی طرح روٹی کی قیمت میں تاریخی کمی کی گئی ہے جس سے غریب طبقات کو سہولت میسر آئے گی ۔ انہوں نے کہا کہ پاکستان مسلم لیگ (ن) نے جس مشکل وقت میں ملک کی بھاگ دوڑ سنبھالی ہے عوام اس سے بخوبی آگاہ ہیں ،پی ٹی آئی کی حکومت نے ملک کو تباہی کے دہانے پر لا کھڑا کیا تھا ،مسلم لیگ (ن) نے ملک اور عوام کی مشکلات کو دیکھتے ہوئے حکومت میں آنے کا مشکل فیصلہ کیا اور ان شا اللہ عوام سے وعدہ ہے انہیں مایوس نہیں کریں گے۔ انہوں نے کہا کہ ملک میں غیر ملکی سرمایہ کاری آنا شروع ہو گئی ہے ، عالمی ادارے بھی معاشی اشاریے بہتر ہونے کی پیشگوئی کر رہے ہیں جس سے امید کی کرن پیدا ہوئی ہے ۔