افغان فورسز اور طالبان کے درمیان شدید لڑائی،51 طالبان ہلاک

0
605

قندھار(این این آئی)قندھار میں طالبان کے گڑھ میں متعدد چوکیوں پر حملے میں افغان فورسز اور طالبان کے درمیان شدید لڑائی میں 51 طالبان جنگجو مارے گئے۔غیرملکی خبررساں ادارے کے مطابق وزارت دفاع کی جانب سے جاری بیان میں کہا گیا کہ طالبان نے قندھار شہر کے آس پاس کے 5 اضلاع میں چوکیوں پر حملہ کیا جس کے جواب میں افغان فورسز نے بھاری فضائی اور زمینی حملہ کیا۔ان کا کہنا تھا کہ سیکیورٹی فورسز نے اس حملے کو ناکام بنادیا جس کے نتیجے میں 51 دہشت گرد ہلاک اور 9 زخمی ہوئے تاہم انہوں نے سرکاری فورسز کی ہلاکتوں کی کوئی تفصیلات فراہم نہیں کیں۔ایک مقامی عہدیدار نے نام ظاہر نہ کرنے کی شرط پر بتایا کہ ایک اضلاع میں افغان فضائی حملے میں ایک خاندان کے سات افراد بھی ہلاک ہوگئے۔انہوں نے کہا کہ افغان فضائیہ دھماکا خیز مواد سے بھری گاڑی کو نشانہ بنانا چاہتی تھی تاہم جب انہوں نے گاڑی کو نشانہ بنایا تو اس میں دھماکہ ہوا اور شہریوں کی ہلاکتیں ہوئیں۔وزارت دفاع کا کہنا تھا کہ وہ واقعے کی تحقیقات کر رہے ہیں۔قندھار سے صحافیوں کے مطابق یہ لڑائی رات کے اوقات میں کئی گھنٹوں تک جاری رہی جس میں مسلسل گولیاں چلتی رہیں اور بھاری بمباری بھی دیکھی گئی۔خیال رہے کہ جنوبی صوبہ قندھار اسلام پسند تحریک کی جائے پیدائش ہے اور گزشتہ چند ہفتوں کے دوران طالبان صوبائی دارالحکومت قندھار کے نواحی اضلاع میں حملے کر رہے ہیں۔ستمبر میں طالبان نے ہمسایہ صوبہ ہلمند میں اسی طرح کی کارروائی کی تھی۔اس حملے جس میں لشکر گاہ کے صوبائی دارالحکومت کو بھی نشانہ بنایا گیا تھا، کے نتیجے میں امریکی افواج نے دفاع کے لیے فضائی حملے کیے تھے۔فروری میں امریکا-طالبان معاہدے کے بعد سے طالبان نے اہم شہروں پر بڑے حملے نہیں کیے ہیں تاہم دیہی علاقوں میں افغان فورسز کے خلاف تقریبا روزانہ حملہ کیا جارہا ہے۔