بنگلہ دیشی حکمران جماعت کے رکن اسمبلی بھارت میں قتل

0
42

کولکتہ(این این آئی)ایک ہفتہ قبل بھارت میں لاپتا ہونے والے بنگلہ دیش کی حکمراں جماعت عوامی لیگ کے رکن اسمبلی کو بھارتی شہر کولکتہ میں قتل کردیا گیا۔بھارتی ٹی وی کے مطابق بنگلہ دیش کے وزیر داخلہ اسد الزماں خان نے بتایا کہ ایک ہفتہ قبل بھارت میں لاپتا ہونے والے بنگلہ دیشی حکمران جماعت کے رکن کی بھارتی شہر کولکتہ میں لاش ملی ہے۔بنگلہ دیش کے سرحدی ضلع جھنیدہ کے ایک حلقے سے عوامی لیگ کے ٹکٹ پر مسلسل تیسری بار کامیابی حاصل کرنے والے 56 سالہ انوار العظیم انار کے لواحقین کے مطابق رکن اسمبلی علاج کے لیے بھارت جانے کے ایک دن بعد 13 مئی کو لاپتا ہو گئے تھے۔اسد الزمان نے صحافیوں کو بتایا کہ رکن اسمبلی کی موت پر تین بنگلہ دیشیوں کو گرفتار کیا گیا ہے۔انہوں نے کہا کہ بنگلہ دیش پولیس اور کولکتہ پولیس مشترکہ تحقیقات کر رہی ہیں اور تحقیقات ہونے تک تمام معلومات کو افشا نہیں کر سکتیں۔بھارتی پولیس نے بتایا کہ قتل کا مقدمہ درج کر لیا گیا ہے البتہ رکن اسمبلی کی لاش ابھی برآمد ہونا باقی ہے۔ریاست مغربی بنگال کے سینئر پولیس افسر اکھیلیش چترویدی نے کہا کہ ہم نے اس ہاسنگ کمپلیکس سے ویڈیو فوٹیج حاصل کی ہے جہاں وہ دورے کے دوران ٹھہرے ہوئے تھے، تحقیقات کے دوران خون کے کچھ دھبے بھی دیکھے گئے ہیں۔ایک اور سینئر پولیس افسر نے نام ظاہر نہ کرنے کی شرط پر بتایا کہ حملہ آوروں کا تعلق دہشت گرد تنظیموں سے ہو سکتا ہے۔وزیر اعظم شیخ حسینہ نے رکن اسمبلی کے انتقال پر تعزیت اور گہرے دکھ کا اظہار کیا۔