نیویارک (این این آئی)امریکی شہر نیویارک میں وزیر داخلہ پاکستان محسن نقوی نے چینی ہم منصب کیو آئی یانجن سے ملاقات کی جس میں دونوں رہنمائوں نے پاک چین تعلقات اور سیکیورٹی امور پر تفصیلی تبادلہ خیال کیا۔ملاقات میں قانون نافذ کرنے والے اداروں اور چین کے تعاون سے متعلق امور پر بھی بات چیت کی گئی، وزیر داخلہ محسن نقوی نے چینی رہنما کو داسو واقعہ پر ہونے والی پیشرفت سے بھی آگاہ کیا۔چینی وزیر داخلہ کیو آئی یانجن نے داسو واقعے پر ہونے والی پیش رفت پر اطمینان کا اظہار کردیا، اس موقع پر گفتگو کرتے ہوئے محسن نقوی نے کہا کہ ہم نے چینی شہریوں کی سیکیورٹی کے فول پروف انتظامات کیے ہیں۔بعد ازاں چینی وزیر داخلہ نے بتایا کہ چین پاکستانی قانون نافذ کرنے والے اداروں کی استعداد بڑھانے کے لیے تعاون کرے گا، پاکستان اور چین ہر موسم کے دوست ہیں، پاکستان اور چین کی دوستی فولاد سے زیادہ مضبوط ہے۔انہوںنے کہاکہ پاک چین دوستی اقوام عالم کے لیے مثال ہے۔
