دوحہ ،قاہرہ(این این آئی)اسرائیلی ٹی وی کی طرف سے کرائے گئے ایک رائے عامہ کے سروے میں یہ بات سامنے آئی ہے کہ نصف سے زیادہ اسرائیلیوں کا خیال ہے کہ نو ماہ سے جاری غزہ جنگ نیتن یاہو کے “سیاسی تحفظات” کی وجہ سے طول پکڑ رہی ہے۔اسرائیلی اخبار کے سروے کے مطابق 54 فیصد افراد نے کہا کہ جنگ ابھی ختم نہیں ہوئی ہے اس کی وجہ نیتن یاہو کے سیاسی تحفظات ہیں۔ 34 فیصد کے مطابق آپریشنل وجوہات کی بنا پر جنگ ختم نہیں ہوسکی۔ 12 فیصد نے اس حوالے سے غیر یقینیت کا اظہار کیا۔جواب دہندگان میں سے 68 فیصد نے کہا کہ نیتن یاہو کا جنگ سے نمٹنے کا طریقہ “خراب تھا”۔ اس کے مقابلے میں 28 فیصد نے جنگ سے نمٹنے کے طریقے کو اچھا خیال کیا اور چار فیصد نے غیر یقینیت کا اظہار کیا۔ تل ابیب کل دو وفود دوحہ اور قاہرہ بھیجے گا تاکہ تبادلے کے معاہدے اور جنگ بندی سے متعلق رکاوٹوں پر بات چیت کی جا سکے۔اسرائیلی ذرائع کے حوالے سے بتایا گیاکہ سی آئی اے کے ڈائریکٹر ولیم برنز اس ہفتے کے آخر میں دوحہ جائیں گے تاکہ مذاکرات تیزی سے آگے بڑھیں۔ اسرائیلیوں کا خیال ہے کہ مذاکرات کئی ہفتے جاری رہ سکتے ہیں۔اسرائیلی فوج نے غزہ کی پٹی میں خونریز حملوں کا سلسلہ جاری رکھا ۔ حماس کے مطابق بے گھر ہونے والے لوگوں کے ایک سکول ہاس کو نشانہ بنایا گیا۔ غزہ کی پٹی میں جنگ اپنے دسویں مہینے میں داخل ہو رہی ہے۔
