واشنگٹن (این این آئی )امریکا کی ٹرمپ انتظامیہ کی ایران کے خلاف زیادہ سے زیادہ دبا برقرار رکھنے کی مہم کے مثبت اثرات مرتب ہورہے ہیں اور وہ امریکا کی پابندیوں کے نتیجے میں آیندہ سال کے مجوزہ فوجی اور سکیورٹی بجٹ میں 24 فی صد تک کٹوتی کرنے پر مجبور ہوگیا ہے۔غیرملکی خبررسا ں ادارے کے مطابق یہ بات امریکی وزیر خارجہ مائیک پومپیو نے ایک بیان میں کہی ۔انھوں نے کہا کہ تیل اور پیٹرو کیمیکلز کی مصنوعات ایرانی نظام کی آمدن کا بنیادی ذریعہ ہیں۔ان کے ذریعے ایرانی نظام اپنے عوام کو جبرواستبداد کا شکار کرتا اور اپنے تخریبی خارجہ مقاصد کو پورا کرتاہے۔انھوں نے یہ بیان امریکا کی ویت نام کی ایک کمپنی اور اس کے چیف ایگزیکٹوآفیسر (سی ای او)پر پابندیاں کے نفاذ کے بعد جاری کیا ۔امریکا کے محکمہ خارجہ نے ویت نام کی گیس اور پیٹروکیمیکل مصنوعات کی حمل ونقل کرنے والی کمپنی کا نام 5 نومبر 2018 کو اپنی پابندیوں کی فہرست میں شامل کیا تھا۔اب محکمہ خزانہ نے بھی اس پر پابندیاں عاید کردیں۔پومپیو کے بہ قول اب محکمہ خارجہ نے اس کمپنی کے سی ای او پر بھی پابندیاں عاید کردیں۔انھوں نے امریکا کے اس موقف کا اعادہ کیا کہ ایرانی نظام کے کردار میں بنیادی تبدیلی کی صورت ہی میں پابندیوں میں نرمی کی جاسکتی ہے۔
