لاہور( این این آئی) وفاقی تحقیقاتی ایجنسی ( ایف آئی اے ) کے اینٹی کرپشن ونگ نے کوٹ لکھپت جیل میں قید مسلم لیگ (ن) کے صدر شہبازشریف سے بیرون ملک جائیداد،آف شورکمپنیوں اور 25 ارب روپے کی ٹرانزیکشن سے متعلق تحقیقات کیں۔ذرائع کے مطابق اسسٹنٹ ڈائریکٹر محمد مردان کی سربراہی میں ایف آئی اے اینٹی کرپشن ونگ کی 3 رکنی ٹیم تحقیقات کیلئے کوٹ لکھپت جیل پہنچی اور اس نے تقریباً دوگھنٹے تک شہباز شریف سے سوالات کے جوابات پوچھے۔ذرائع کے مطابق شہبازشریف کا کہنا تھا کہ چپڑاسی اور ملازمین کے اکائونٹس میں پیسے آنے کا انہیں نہیں، بیرون ملک جائیداد کاتمام ریکارڈ گوشواروں میں موجود ہے۔ ذرائع کے مطابق شہباز شریف سے ان کی اور فیملی کی بیرون ملک جائیداد، آف شور کمپنیوں،حوالہ ہنڈی کی رقم اور رمضان شوگر ملز کے چپڑاسی اور کلرکس کے اکائونٹ میں 25 ارب روپے کی ٹرانزیکشن سے متعلق سوالات کیے گئے۔ذرائع کے مطابق شہبازشریف کا کہناتھاکہ انہوں نے ایک دھیلے کی کرپشن نہیں کی، حوالہ ہنڈی کاروبار کو نہیں جانتا، نہ اس کے ذریعے کبھی ٹرانزیکشن کی، کمپنی کے اکائونٹس کی دیکھ بھال چیف فنانشل آفیسرکی ذمہ داری ہے۔
