اسلام آباد (این این آئی) وزیراعظم آزادکشمیر راجہ محمد فاروق حیدر نے کہا ہے کہ ہندوستان خطے میں انتہاء پسندی کا مرکز بنتا جارہاہے ،مودی کی مسلم دشمن پالیسیوں کی بدولت خطے کا امن خطرے میں ہے،پاکستان کے استحکام ،سلامتی کیلئے دعا گو ہیں ،ملک کے مفاد میں گرینڈ ڈائیلاگ نا گزیر ہے،سیاسی جماعتوں ،عدلیہ ،اسٹیبلشمنٹ سمیت تمام سٹیک ہولڈرز کو اکٹھے بیٹھنا پڑیگا۔وزیراعظم آزادکشمیر راجہ محمد فاروق حیدر نے ہفتہ کو نیشنل پریس کلب کا دورہ کیا اور مرحوم صحافیوں ،ان کے والدین اور عزیز و اقارب کی وفات پر تعزیت اور فاتحہ خوانی کی۔ وزیراعظم محمد فاروق حیدر نے کہا کہ صحافیوں کہ زندگی مشکل ترین زندگی ہوتی ہے ،یہاں آنے کا مقصد جاںبحق ہونے والے صحافی حضرات کی تعزیت کرنا تھا ۔ انہوں نے کہا کہ کشمیر کے لوگوں کا پاکستان کا تعلق کئی نسلوں سے ہے ،کشمیریوں نے انتہائی نامساعد حالات میں بھی اس رشتے کو کمزور نہیں ہونے دیا ۔انہوں نے کہا کہ پاکستان کے عوام کے شکرگزار ہیں جنہوں نے کشمیر کے ساتھ اس محبت کو نسل در نسل منتقل کیا ۔انہوں نے کہا کہ پاکستان کے اندر سیاسی استحکام ہوگا تو ہندوستان کو منہ توڑ جواب دیا جاسکے گا ۔انہوں نے کہا کہ ہمیں کشمیر سے زیادہ پاکستان کی فکر رہتی ہے ۔انہوں نے کہا کہ ہندوستان خطے میں انتہا پسندی کا مرکز بنتا جارہاہے ،مودی کی مسلم دشمن پالیسیوں کی بدولت خطے کا امن خطرے میں ہے ۔انہوں نے کہا کہ پاکستان کے استحکام اور سلامتی کے لیے دعا گو ہیں ،ملک کے مفاد میں گرینڈ ڈائیلاگ نا گزیر ہے۔انہوں نے کہا کہ سیاسی جماعتوں ،عدلیہ ،اسٹیبلشمنٹ سمیت تمام سٹیک ہولڈرز کو اکٹھے بیٹھنا پڑیگا ۔انہوں نے کہا کہ پاکستان ہمارا ملک ہے اس کے سیاسی معاملات سے بھی علیحدہ نہیں رہ سکتے۔
