اسلام آباد (این این آئی)سربراہ پاک فضائیہ ائیر چیف مارشل مجاہد انور خان نے پاک چین مشترکہ فضائی مشق شاہینـ IX کے دوران ایک چینی ساختہ جنگی جہاز میں پرواز کی۔ترجمان پاک فضائیہ کے مطابق ائیر چیف نے فضائی مشق میں حصہ لینے والے شرکاء کی پیشہ ورانہ صلاحیتوں اور جنگی مہارت کی بھرپور تعریف کی۔ انہوں نے کہاکہ موجودہ حالات کے تناظر میں ملٹری ایوی ایشن ٹیکنالوجی دور جدید کی عسکری ضروریات کا ایک اہم جز ہے۔ ائیر چیف نے کہاکہ شاہین سیریز مشقیں دونوں فضائی افواج کے لیے ایک دوسرے کی جنگی مہارت سے استفادہ حاصل کرنے اور باہمی تعاون کو فروغ دینے میں معاون ثابت ہوں گی۔ انہوں نے کہاکہ اس مشق سے دونوں فضائی افواج کے درمیان موجودہ پیشہ ورانہ تعلقات کو مزید تقویت ملے گی۔
