جیک کیلس انگلینڈ کرکٹ ٹیم کے بیٹنگ کوچ مقرر

0
310

لندن (این ای نآئی)انگلینڈ اینڈ ویلز کرکٹ بورڈ (ای سی بی) نے جنوبی افریقہ کے سابق مایہ ناز آل راؤنڈر جیک کیلس کو سری لنکا کے دورہ کے لیے ٹیم کا بیٹنگ کوچ مقرر کردیا۔غیر ملکی میڈیا کے مطابق ٹیسٹ کرکٹ میں 13 ہزار سے زائد رنز بنانے والے کیلس انگلینڈ کے ہیڈ کوچ کرس سلورووڈ اور اسسٹنٹ کوچ پال کولنگ ووڈ کے ماتحت کام کریں گے۔انگلینڈ کی ٹیم کے ساتھ جیمز فوسٹر بطور وکٹ کیپنگ، کارل ہوپکنز فیلڈنگ، جون لیوس باؤلنگ اور جیتن پٹیل اسپین باؤلنگ کنسلٹنٹ کے طور پر کام کر رہے ہیں۔جیک کیلس کرکٹ ریٹائرمنٹ کے بعد انڈین پریمیئر لیگ (آئی پی ایل) کی ٹیم کولکتہ نائٹ رائیڈرز کے کوچ کے علاوہ جنوبی افریقہ کی قومی ٹیم کے ساتھ بھی کام کر چکے ہیں۔جنوبی افریقہ کی ٹیم کے حالیہ دورہ انگلینڈ میں وہ ٹیم کے ساتھ نہیں تھے۔انگلینڈ کی ٹیم کا دورہ سری لنکا اگلے مہینے شروع ہوگا جو انگلینڈ میں کورونا وائرس کی نئی لہر کے باوجود ملتوی نہیں کیا گیا،سری لنکا کے دورے میں انگلینڈ کی ٹیم دو ٹیسٹ کھیلے گی جس کے بعد بھارت پہنچے گی،جو روٹ کی قیادت میں انگلینڈ کی 24 رکنی ٹیم کا اعلان کر دیا گیا ہے جس میں 7 اضافی کھلاڑی بھی شامل ہیں۔انگلینڈ اور سری لنکا کے درمیان پہلا ٹیسٹ گال میں 14 جنوری کو شروع ہوگا جبکہ دوسرا ٹیسٹ 22 جنوری کو گال میں ہی کھیلا جائے گا۔خیال رہے کہ برطانیہ میں نئے کورونا وائرس کے پیش نظر پاکستان اور یورپ سمیت دنیا کے دیگر کئی ممالک نے وہاں سے آنے والے مسافروں پر عارضی پابندیاں عائد کردی ہے۔