اسلام آباد (این این آئی)پاکستان پیپلز پارٹی کے سینیٹر مصطفی نواز کھوکھر نے کہا ہے کہ سی ڈی اے کی جانب سے وزیراعظم کا گھر ریگیولرائز کرنا اختیارات کے ناجائز استعمال کی بدترین مثال ہے، عمران خان اقتدار سے پہلے جو دعوے کرتے تھے اب اس کے برعکس کر رہے ہیں ، عمران خان تو ایک پاکستان بنانے چلے تھے مگر انہوں نے اپنے اور دوستوں کیلئے الگ پاکستان بنا لیا ہے۔ اپنے بیان میں انہوںنے کہاکہ اب ایک نہیں دو پاکستان ہیں جہاں غریب کا گھر مسمار اور وزیراعظم کا گھر ریگیولرائز ہو جاتا ہے۔ سینیٹر مصطفی نواز کھوکھر نے کہاکہ اختیارات کے ناجائز استعمال پر تحقیقاتی ادارے سی ڈی اے حکام سے باز پرس کریں ،اب نیب کہاں ہے کیوں اس معاملے پر کوئی ایکشن نہیں لیا جا رہا ؟ ۔ انہوںنے کہاکہ اپوزیشن کے سیاستدانوں اور بیوروکریٹس پر تو مقدمات بنتے ہیں مگر وزیراعظم سے کوئی نہیں پوچھ رہا ۔
