کراچی(این این آئی) جمعیت علما اسلام کے سینئر رہنما اور سابق پارلیمنٹیرین حافظ حسین احمد نے کہا ہے کہ جمعیت علماء اسلام کو ن لیگ، پی پی جیسی نہج پر پہنچایا جا رہا تھاتو میں نے اس کے خلاف آواز بلند کی،پارٹی میں موروثیت کے خلاف ہیں، مولانا فضل الرحمان کو پیپلز پارٹی کی حقیقت آج معلوم ہوئی، کاش وہ ہماری بات مان لیتے تو اپنی پارٹی کو اتنا نقصان نہ پہنچتا۔گفتگوکرتے ہوئے حافظ حسین احمد نے کہا کہ مولانا فضل الرحمن نے موروثی سربراہ بننے کی کوشش کی جسے ناکام بنا دیا گیا، پارٹی میں موروثیت کے خلاف ہیں، دستور کے مطابق جو بھی پارٹی کا سربراہ بنے اس کا ساتھ دیں گے۔انھوں نے کہاکہ موروثی لیڈر شپ کے حوالے سے مسلم لیگ( ن) اور پیپلز پارٹی کے حالات سب کے سامنے ہیں جہاں اہم ارکان پیچھے کھڑے ہوتے ہیں جب کہ معاملات لڑکے اور لڑکیاں دیکھتی ہیں۔انہوں نے کہا کہ مسلم لیگ( ن) کی ویٹو پاور مریم نواز اور پیپلز پارٹی کی بلاول کے پاس ہے، مریم نواز کی کوالیفکیشن صرف یہ ہے کہ وہ میاں نواز شریف کی بیٹی ہیں۔حافظ حسین نے کہاکہ ماضی میں مولانا شیرانی کو مولانا فضل الرحمان کے مقابلے میں پارٹی سربراہ بنانے کی بات کرنے والے ساتھیوں کو خاموش کروایا گیا۔ہم چاہتے ہیں کہ جے یو آئی کو نقصان نہ پہنچے، الگ گروپ بنانے کا کوئی ارادہ نہیں ہے۔
