کابل (این این آئی)افغان حکومت اور طالبان کے مابین امن بات چیت کا نیا دور خلیجی ریاست قطر کے دارالحکومت دوحہ میں منگل (پانچ جنوری) سے شروع ہو گا۔ نئے مذاکراتی دور کے باوجود ہندوکش کی اس ریاست میں طالبان کے مسلح حملوں میں تاحال کوئی کمی نہیں آئی۔غیرملکی خبررساں ادارے کے مطابق کابل حکومت اور طالبان کے مابین اس انٹرا افغان مکالمت میں گزشتہ کئی ماہ کے دوران اب تک کوئی بڑی پیش رفت دیکھنے میں نہیں آئی۔ بتایا گیا ہے کہ شروع ہونے والی بات چیت میں کابل حکومت کے مذاکرات کار ملک میں مستقل جنگ بندی اور سن 2001 میں طالبان حکومت کی برطرفی کے بعد متعارف کرائے گئے موجودہ نظام حکومت کے تسلسل پر زور دیں گے۔ حکومتی مذاکرات کار غلام فاروق مجروح نے بتایا کہ یہ بات چیت انتہائی پیچیدہ اور صبر آزما ثابت ہو سکتی ہے۔
