نیوزی لینڈ اے نے پاکستانی شاہینز کو بیس رنز سے ہرادیا

کرائسٹ چرچ(این این آئی)نیوزی لینڈ اے نے پاکستانی شاہینز کو بیس رنز سے ہرادیا۔دونوں ٹیموں کے مابین ٹی ٹونٹی میچ لنکن، کرائسٹ چرچ میں کھیلا گیا۔ 182رنز کے تعاقب میں پاکستان شاہینز کی پوری ٹیم 161 رنز پر آئوٹ ہوگئی ۔مڈل آرڈر بیٹسمین خوشدل شاہ 70 اور حسین طلعت 44 رنز بنا کر آئوٹ ہوئے۔نیوزی لینڈ اے کے جیکب اور آدتیا نے تین تین وکٹیں حاصل کیں ۔نیوزی لینڈ اے نے مقررہ بیس اوورز 5 وکٹوں کے نقصان پر 181 رنز بنائے تھے ۔جوئے کارٹر 81 رنز بنا کر ناٹ آئوٹ رہے تھے۔پاکستانی شاہینز کے محمد حسنین اور دانش عزیز نے 2, 2 وکٹیں حاصل کی تھیں ۔نیوزی لینڈ کے دورے پر آئی پاکستانی شاہینز کی ٹیم نے مجموعی طور پر پانچ ٹی ٹونٹی میچز کھیلے ،تین میں اسے شکست اور دو میں کامیابی ملی ۔سیریز کا واحد چار روزہ میچ پاکستان شاہینز نے جیتا تھا۔