اسلام آباد(این این آئی)حکومت اور آئی آئی پیز کے درمیان معاہدہ طے پاگیا ہے۔ نجی ٹی وی نے ذرائع حوالے سے بتایاکہ حکومتی مذاکراتی ٹیم اور شمسی توانائی پر مشتمل آئی پی پیز نے ٹیرف کم کرنے پر آمادگی ظاہر کردی ہے، معاہدے پرباضابطہ دستخط وفاقی کابینہ کی منظوری کے بعد ہونگے۔ذرائع کے مطابق وفاقی کابینہ سے منظوری کے بعد حکومتی افسران اور آئی پی پیز معاہدے پرباضابطہ دستخط کرینگے، معاہدے کی رو سے ہر آئی پی پی کا اپنا اپنا بورڈ بھی معاہدے کی منظوری دے گا، معاہدے سے ٹیرف اور آئندہ سالوں میں سرکولر ڈیٹ میں کمی آئے گی۔ذرائع کے مطابق دونوں فریقین ملک کے وسیع تر مفاد میں کمپنیز کنٹریکٹ میں ترمیم پر رضامند ہوئے۔ذرائع کے مطابق کمپنیز پاور سیکٹر کے استحکام کیلئے کنٹریکٹ میں ترمیم پر راضی ہوئیں، حکومت کمپنیز کی قرض خواہوں سے ازسر نومفاہمت کرائیگی، حکومت کمپنیز کو موجودہ سولر سائٹس پر اضافی پیداوار میں مدد کرے گی، ماہرمعاشیات مزمل اسلم نے حکومتی ٹیم او رآئی پی پیز میں معاہدے کو بڑی پیشرفت قرار دیتے ہوئے کہا کہ اس اقدام سے کمپنیوں کا پھنساہوا پیسہ ریلیزہونا شروع ہوجائے گا اور معاہدے کا اثراسٹاک ایکس چینج پر بھی پڑیگا۔
