پشاور(این این آئی) وفاقی وزیر داخلہ شیخ رشید احمد نے واضح کیا ہے کہ کسی دشمن کو ملک کا امن وامان خراب کرنے کی اجازت نہیں دیں گے۔بدھ کو وزیر داخلہ شیخ رشید احمد اور وزیر اعلیٰ کے پی محمود خان کی مشترکہ زیر صدارت امن اومان کے حوالے سے اجلاس منعقد ہواجس میں وزیر داخلہ شیخ رشید احمد کو صوبے میں امن و امان کی صورتحال پر بریفنگ دی گئی،اجلاس میں صوبے کے چیف سیکرٹری، آئی جی پولیس اور دیگر قانون نافذ کرنے والے اداروں نے شرکت کی،وزیر داخلہ کی امن وامان کے حوالے سے صوبے کی انتظامیہ اورقانون نافذ کرنے والے اداروں کی کارکردگی کو سراہا۔ شیخ رشیدنے کہاکہ صوبے نے امن وامان کی صورت حال میں فرنٹ لائین کا کردار ادا کیا،امن و امان حاصل کرنے کے لئے ہم نے بڑی قربانیاں دی ہیں۔شیخ رشید احمد نے کہاکہ کسی دشمن کو ملک کا امن وامان خراب کرنے کی اجازت نہیں دینگے۔ انہوںنے کہاکہ صوبہ خیبر پختونخواہ کو تمام ضروری وسائل مہیا کرینگے۔
