اسلام آباد(این این آئی) پاکستان کرکٹ ٹیم کے سابق کپتان عالمی شہرت یافتہ آل رائونڈر شاہد خان آفریدی نے کہاہے کہ وہ آئندہ ماہ افغانستان کے دورے کا پروگرام بنا رہے ہیں ۔ اسلام آباد میں خیبر پختون خوا کی سماجی شخصیت میجر ریٹائرڈ عامر کی رہائش گاہ پر اپنے اعزاز میں دیئے گئے عشائیہ کے موقع پر ”این این آئی ” سے مختصر گفتگو میں شاہد آفریدی نے کہاکہ انہیں افغان حکام کی جانب سے دورے کی دعوت ملی ہے اور وہ آئندہ ماہ کے آخر میں افغانستان جانے کا سوچ رہے ہیں ۔عشائیے میں اہم ٹی وی اینکر سلیم صافی ، حامد میر ، رئوف کلاسرا کے علاوہ سینئر صحافیوں اور اہم شخصیات نے شرکت کی ۔شاہد آفریدی کے دفتر کے مطابق دورے میں شاہد آفریدی فائونڈیشن کی جانب سے افغانستان میں امداد ی منصوبوں کو شروع کر نے کا جائزہ لیا جائیگا ۔شاہد آفریدی کے سٹاف کے مطابق شاہد آفریدی افغان کرکٹرز اور بورڈ کے حکام سے بھی ملاقاتیں کرینگے ۔
