اسلام آباد (این این آئی) پاکستان پیپلز پارٹی کے رہنما سینیٹر رحمان ملک نے کہاہے کہ وقت کی ضرورت ہے کہ ہم قائداعظم کے سنہری اصول ‘اتحاد ، ایمان اور نظم وضبط’ پر عمل کریں۔ یوم پاکستان پر اپنے پیغام میں انہوںنے کہاکہ وقت کی ضرورت ہے کہ ہم قائداعظم کے سنہری اصول ‘اتحاد ، ایمان اور نظم وضبط’ پر عمل کرے، آج کا دن ہمارے عظیم بانی رہنماؤں اور بزرگوں کی جہد مسلسل و قربانیوں کی یاد دلاتا ہے۔ انہوںنے کہاکہ ہمارے عظیم بانی رہنماؤں و بزرگوں نے لازوال قربانیاں دیکر ہمیں ایک آزاد ملک دیا، اس اہم قومی دن پر ہمیں سوچنا ہوگا کہ پاکستان نے ہمیں بہت کچھ دیا مگر ہم نے پاکستان کو کیا دیا۔ انہوںنے کہاکہ میں بابائے قوم، تحریک آزادی کے تمام قائدین اور اپنے بزرگوں کو حراج تحسین و عقیدت پیش کرتا ہوں۔ انہوںنے کہاکہ ان تمام شہداء کو سلام پیش کرتا ہوں جنہوں نے پاکستان بنانے کے لئے اپنی جانوں کا نذرانہ پیش کیا۔ انہوںنے کہاکہ افواج پاکستان کے بہادر شہیدوں کو سلام جنہوں ملکی سالمیت اور دھشتگردی کیخلاف جنگ میں قربانیاں پیش کئے، آج پاکستان سیاسی، معاشی و دیگر مسائل سے گزر رہا ہے۔ انہوںنے کہاکہ ہمیں اسطرح کی اتحاد کی ضرورت ہے جو ہمارے اباواجداد نے پاکستان بناتے وقت دیکھایا تھا، سب سیاسی جماعتوں سے اپیل ہے کہ باہمی اختلافات کو بھلا کر قومی و ملکی مسائل کے کئے اکٹھے ہو، انہوںنے کہاکہ قائداعظم کے فرمان اتحاد، ایمان اور تنظیم پر عمل کرتے ہوئے ہم ملک کو مسائل سے نکال سکتے ہیں، آؤ ہم سب عہد کرے کہ آنے والے نسل کے لئے ایک ترقی یافتہ، پرامن اور خوشحال پاکستان دینگے
