اسلام آباد (این این آئی)سیکرٹری جنرل پیپلز پارٹی نیر بخاری نے کہاہے کہ پی ڈی ایم ایک سیاسی اشتراک عمل ہے کوئی ادارہ یا کمپنی نہیں۔ اپنے بیان میں نیئر حسین بخاری نے کہاکہ پیپلز پارٹی سیاسی اتحاد میں افہام و تفہیم پر یقین رکھتی ہے، تسلط اور جبر ہمیں کسی صورت میں قبول نہیں،،۔ انہوںنے کہاکہ احسن اقبال مت بھولیں نواز شریف کا پی ڈی ایم حصہ بننا چیئرمین بلاول بھٹو کی بصیرت کااعتراف ہے ،پیپلز پارٹی نہیں چاہتی پی ڈی ایم کا شیرازہ بکھرے۔ انہوںنے کہاکہ چیئرمین بلاول بھٹو شہدا وطن و جمہوریت کے سیاسی جان نشین ہیں، چیئرمین بلاول بھٹو نے بچپن میں شہید جمہوریت بے نظیر بھٹو کے ہمراہ جبر کا مقابلہ سیکھا۔ انہوںنے کہاکہ آئین جمہوریت اور پارلیمنٹ کی خاطر جدوجہد اور قربانیوں دینے والوں اور آمر کی گود میں پلنے والوں سے قوم آگاہ ہے،انہوںنے کہاکہ پیپلز پارٹی آئین کی خالق اور جمہوریت کی پاسدار جماعت ہے، پیپلز پارٹی نے بحالی جمہوریت تحریکوں کی بنیاد رکھی پی ڈی ایم کا قیام بھی پیپلز پارٹی کی میزبانی میں ہوا
