اسلام آباد (این این آئی)سابق ڈی جی ایف آئی بشیر میمن کے بیان پر پیپلزپارٹی نے تحقیقات کے لئے پارلیمانی کمیٹی تشکیل دینے کا مطالبہ کردیا۔ جمعرات کو اپنے بیان میں سلیم مانڈی والا نے کہاکہ سابق ڈی جی ایف آئی اے کا بیان انتہائی اہم اور حکومت کے خلاف چارج شیٹ ہے۔ انہوںنے کہاکہ بشیر میمن کے بیان نے ملک میں احتساب کے نام پر انتقام اور انسانی بنیادی حقوق کی خلاف ورزیوں سے پردہ اٹھا دیا ہے۔ انہوںنے کہاکہ وزیراعظم، وزیر قانون، مشیر برائے احتساب کو سامنے آکر الزامات پر وضاحت دینی چاہئے۔ انہوںنے کہاکہ واضح ہوگیا کہ نیب اور ایف آئی اے کو اپوزیشن کے خلاف جھوٹے مقدمات کے لئے استعمال کیا جاتا رہا ہے، اپوزیشن ارکان تو اپنی جگہ احتساب کے نام پر معزز ججز سے بھی انتقام لیا جا رہا ہے۔ سلیم مانڈی والا نے کہاکہ بشیر میمن کے بیان سے اپوزیشن کے تحفظات اور خدشات کو تقویت ملتی ہے، پارلیمانی کمیٹی تشکیل دیکر معاملے کی فوری تحقیقات کی جائیں۔ انہوںنے کہاکہ تحقیقات کی جائیں کہ کون کون سے لوگ ہیں جو اداروں پر اپوزیشن کے خلاف جھوٹے مقدمات بنانے کے لئے دباو ڈالتے رہے۔
