جدہ (این این آئی)وزیر خارجہ شاہ محمود قریشی نے کہا ہے کہ وزیر اعظم سے ولی عہد کی ملاقات کا ماحول انتہائی دوستانہ تھا ،سعودی ولی عہد نے ہمیں سعودی عرب کے وژن کے خدوخال سے تفصیلاً آگاہ کیا ،وژن کو عملی جامہ پہنانے کیلئے اگلے دس سال کے دوران، دس ملین افرادی قوت درکار ہو گی ، پاکستانی ورک فورس کی گذشتہ خدمات کو مدنظر رکھتے ہوئے، مطلوبہ ورک فورس کا زیادہ حصہ پاکستان سے لیا جائیگا، روزگار کے مواقعوں ،کے حوالے سے پاکستانیوں کیلئے ایک بہت بڑی خبر ہے ، سعودی عرب سے پانچ معاہدوں پر دستخط ہوئے ہیں ،معاہدے کی رو سے سعودی عرب پاکستان کو سعودی ڈویلپمنٹ فنڈ سے500 ملین ڈالر کی رقم فراہم کرے گا ، ولی عہدنے دورہ پاکستان کی دعوت قبول کرلی ، عید کے بعد سعودی عرب کا وفد پاکستان آئیگا ۔ وزیر خارجہ مخدوم شاہ محمود قریشی نے جدہ میں وزیر اعظم کے دورہ سعودی عرب کے حوالے سے خصوصی میڈیا سے گفتگو کرتے ہوئے کہاکہ میں اس وقت جدہ میں ہوں وزیر اعظم عمران خان کی ولی عہد شہزادہ محمد بن سلمان کے ساتھ ملاقات ہوئی ہے جس میں ان کی کابینہ کے اہم اراکین بھی موجود تھے ،میری سعودی وزیر خارجہ شہزادہ فیصل بن فرحان آل سعود کے ساتھ بھی نشست ہوئی ہے
