ریاض (این این آئی)سعودی وزیرخارجہ شہزادہ فیصل بن فرحان نے کہا ہے کہ یمن میں جنگ بندی کے لیے گیند اب حوثیوں کے کورٹ میں ہے۔انھوں نے عرب ٹی وی سے گفتگو میں کہا ہے کہ یمن میں جاری بحران کے خاتمے کے لیے سعودی عرب کا پیش کردہ امن اقدام اس وقت معطل ہے کیونکہ ایران کے حمایت یافتہ حوثی باغی اس کو مسترد کرچکے ہیں۔انھوں نے کہاکہ ایران کے کردار سے متعلق خطے کیملکوں کی تشویش کو دور کیے بغیر کوئی پیش رفت نہیں ہوسکتی۔ ایران کے بیلسٹک میزائلوں کے پروگرام اور اس کی خطے کے دوسرے ممالک میں مداخلت سے متعلق ایشوز کو طے کیا جانا چاہیے۔سعودی عرب نے مارچ میں یمن میں ایران کے حمایت یافتہ حوثی شیعہ باغیوں اور بین الاقوامی سطح پر تسلیم شدہ حکومت کے درمیان جاری تنازع کے خاتمے کے لیے ایک نیا امن منصوبہ پیش کیا تھا لیکن حوثیوں نے اس کو کسی قسم کی بات چیت سے قبل ہی مسترد کردیا تھا۔شہزادہ فیصل نے سعودی عرب کی جانب سے اس توقع کا اظہار کیا ہے کہ حوثی علاقائی فریقوں کے مفادات کے بجائے یمن کے مفاد کو مقدم جانیں گے۔انھوں نے مملکت کے اس مؤقف کا اعادہ کیا ہے کہ وہ یمن میں جاری بحران کا سیاسی حل چاہتی ہے
