کراچی(این این آئی)وزیر تعلیم سندھ سعید غنی نے کہاہے کہ حلیم عادل شیخ پر زمین پر قبضوں کے الزامات درست ہیں، چیئرمین نیب کہہ دیں پی ٹی آئی رہنما کو گرفتار نہیں کریں گے، حلیم عادل کی گرفتاری کے مطالبے پر مروڑ چیئرمین نیب کو اٹھ رہے ہیں، آپ غلط آدمی سے پنگا لے رہے ہیں، منتظر ہوں نیب مجھے بلائے، ان کے منہ پر ان کے کرتوت بتائوں گا، نیب کے قانون کا غلط استعمال سب سے زیادہ چیئرمین نیب کر رہے ہیں۔میڈیا سے بات چیت میں سعید غنی نے کہاکہ میں کہہ رہا ہوں حلیم عادل کو گرفتار کریں، پوری نیب اچھل پڑی، توقع نہیں تھی حلیم عادل کی گرفتاری کے مطالبے پر نیب کو تکلیف ہوگی، حلیم عادل شیخ نے غلط طریقے سے لوگوں کو زمینیں بیچیں۔ انہوں نے کہا کہ نیب اس ملک کے معزز لوگوں کیساتھ زیادتی کر رہی ہے، نیب کی وجہ سے بے شمار لوگوں نے خود کشیاں کیں۔انہوں نے کہاکہ نیب نے ایک پریس ریلیز جاری کی ہے، نیب نے کہاکہ میرے بیان کا 31 اے کے تحت جائزہ لیا جارہا ہے، نیب کی پریس ریلیز سے تاثر ملا کہ میں توہین نیب کا مرتکب ہوا ہوں۔انہوں نے کہاکہ چیلنج کرتا ہوں نیب مجھے نوٹس بھیجے، ان کے منہ پر ان کے کرتوت بتائوں گا،چیئرمین نیب حکومتی ایما پر کام کرتے ہیں، چیئرمین نیب حکومت کے ہاتھوں بلیک میل ہو رہے ہیں، قانون کا غلط استعمال سب سے زیادہ چیئرمین نیب کر رہے ہیں
