حکومت کورونا ویکسی نیشن کیلئے عوام کو راغب نہ کر سکی’ حید رسلطان

0
41

لاہور( این این آئی)ناموراداکار حیدرسلطان نے کہا ہے کہ کورونا وباء کاطویل ہوتا دورانیہ ہر شعبے کیلئے مشکلات پیدا کررہاہے ، ہم سب کو خدا کے حضور گڑ گڑاکر اس سے نجات کی دعائیں مانگنی چاہئیں ،حکومت کورونا ویکسی نیشن کیلئے اس طرح شعور نہیں دے سکی جس کی ضرورت تھی ۔ خصوصی گفتگو کرتے ہوئے حید رسلطان نے کہا کہ کسی بھی مہم کو کامیاب کرنے کیلئے حکومت کو مثال بننا پڑتا ہے ،کابینہ کے اراکین ، بیورو کریسی ،سیاستدان سب کے سامنے کورونا ویکسی نیشن کراتے اور اس کی پرنٹ،الیکٹرانک اور سوشل میڈیا کے ذریعے بھرپور تشہیر کی جاتی ، ویکسی نیشن سے متعلق ان شخصیات کے بیانات سامنے لائے جاتے تاکہ لوگوں کے اندر ویکسی نیشن کے بارے میں پیدا ہونے والی غلط فہمی دور ہوتی۔ شوبز اور کھیلوں سمیت دیگرشعبوں سے وابستہ نامور شخصیات کی ویکسی نیشن کے ذریعے عوام کو اس جانب راغب کیا جانا چاہیے تھا ۔ انہوں نے کہا کہ معاشروں کو قانون اور ضابطے کا پابند بناناحکومت کی ذمہ داری ہے لیکن ضروری نہیں کہ اس کے لئے ڈنڈااٹھا لیا جائے بلکہ ہمیں مہذب معاشروں کے طور طریقے اپنانے چاہئیں۔ انہوں نے کہاکہ عوام سے اپیل ہے کہ کورونا ویکسی نیشن کرائیں کیونکہ یہ زندگی کو اس وباء سے محفوظ رکھنے کے لئے انتہائی ضروری ہے ،ہم سب کو بلا تاخیر ویکسی نیشن کرانی چاہیے تاکہ پاکستان کو جلد سے جلد اس وباء سے نجات مل سکے۔