نیویارک(این این آئی)امریکا کی ریاست نیویارک کے گورنر اینڈریو کوومو نے اپنے خلاف جنسی ہراسیت کے الزامات کی تحقیقات کے بعد عہدے سے استعفا دے دیاہے۔میڈیارپورٹس کے مطابق 63 سالہ کوومو نے نیویارک کی اٹارنی جنرل لیٹیٹیا جیمز کی پانچ ماہ تک آزادانہ تحقیقات کی رپورٹ منظرعام پر آنے کے بعد عہدے سے مستعفی ہونے کا اعلان کیا ۔ اس میں یہ نتیجہ اخذ کیا گیا کہ انھوں نے ایسا نازیبا طرزعمل اختیار کیا تھا جو امریکی اور ریاستی قوانین کے منافی تھا اور وہ ان قوانین کی خلاف ورزی کے مرتب ہوئے ہیں۔انھوں نے ٹیلی ویژن پر20 منٹ تک تقریر کی اور کہا کہ ان کے استعفاکا اطلاق 14 دن میں ہو جائے گا۔اس طرح ان کے طویل سیاسی کیریئر کا بھی خاتمہ ہوجائے گا۔کوومو نے ایک بار پھر کسی بھی غلط کاری کی تردید کی۔ البتہ انھوں نے خواتین کوناراض کرنے کی مکمل ذمہ داری قبول کی مگراپنے طرزعمل کو غلط نہیں کہا اور اس کی یہ توضیح بیان کی کہ وہ تو خواتین سے محبت کے اظہار یا انھیں محظوظ کرنے کے لیے ایسا کیا کرتے تھے۔گورنر کے عہدے سے مستعفی ہونے سے وہ ڈیموکریٹس کی بالادستی کی حامل ریاستی اسمبلی میں اپنے خلاف مواخذے کی کارروائی بھی بچ گئے کیونکہ مقننہ میں ان کے مواخذے کا قومی امکان تھا اور اس طرح انھیں زیادہ بے توقیر ہو کر گورنری سے دستبردار ہونا پڑتا
