اسلام آباد (این این آئی)ترجمان دفتر خارجہ زاہد حفیظ نے کہا ہے کہ پاکستان کو افغانستان میں تیزی سے ابتر ہوتی صورت حال پر تحفظات ہیں، کوئی بھی ملک ہم سے زیادہ افغانستان میں قیام امن کا حامی نہیں،ہم نے ہمیشہ افغانستان سے امریکہ کے ذمہ دارانہ انخلاء کی بات کی،بھارت نے ہمیشہ افغانستان میں سپائلر کا کردار ادا کیا،بھارت افغان سرزمین پاکستان کے خلاف استعمال کررہا ہے،افغانستان کے موجودہ حالات کے باعث پاکستان میں مہاجرین کا سیلاب پاکستان آئیگا،پاکستان مزید افغان مہاجرین کی میزبانی کا متحمل نہیں ہو سکتا،امید ہے ٹرائیکا پلس سے بین الافغان ڈائیلاگ آگے بڑھے گا، عالمی برادری،او آئی سی اور اقوام متحدہ کو مسئلہ کشمیر کے حل کے لیے اپنا کردار ادا کرنا چاہیے ۔ جمعہ کو یہاں ترجمان دفترخارجہ زاہد حفیظ چوہدری نے ہفتہ وار بریفنگ دیتے ہوئے کہاکہ عراق کے وزیر خارجہ ڈاکٹر فواد حسین نے پاکستان کا دورہ کیا ،انہوں نے دورہ وزیر خارجہ کی دعوت پر کیا،ملاقاتوں میں باہمی تعلقات،علاقائی مسائل، افغانستان کی صورتحال اور باہمی دلچسپی کے معاملات پر تبادلہ خیال کیا گیا،عراق کا دورہ کرنے والے پاکستانی زایرین کے ویزا معاملات پر تبادلہ خیال کیا گیا۔ انہوںنے کہاکہ پاکستان نے نجف اور کربلا میں قونصل خانے کھولنے کا فیصلہ کیا ہے۔ انہوںنے کہاکہ پاکستان کو افغانستان میں تیزی سے ابتر ہوتی صورتحال پر تحفظات ہیں،2001 سے اب تک ہم نے 80 ہزار سے زائد جانوں کا نقصان اٹھایا،کوئی بھی ملک ہم سے زیادہ افغانستان میں قیام امن کا حامی نہیں۔ انہوںنے کہاکہ افغانستان پر ایمبیسڈر محمد صادق ٹرائیکا پلس ملاقات اور علاقائی اجلاس میں شرکت کے لیے دوحہ گئے۔ترجمان دفترخارجہ نے کہاکہ او آئی سی کے انسانی حقوق کمیشن کے وفد نے پاکستان کا دورہ کیا،وفد نے پاکستان اور آزاد کشمیر کا دورہ کیا،وفد نے کشمیری مہاجرین،سول سوسائٹی سے بھی ملاقاتیں کیں،وفد او آئی سی وزرائے خارجہ اجلاس میں اپنی تفصیلی رپورٹ پیش کرے گا
