اسلام آباد (این این آئی) وزیر خارجہ شاہ محمود قریشی نے کہاہے کہ افغانستان کی بدلتی ہوئی صورتحال پر سب کی نظرہے،افغانستان سے پر امن انخلاء کے حامی ہیں،پاکستان اپنا مثبت کردار ادا کرنے کیلئے پر عزم ہے،کابل میں تعینات ہمارے سفیر کے بھی مختلف شخصیات کے ساتھ روابط ہو رہے ہیں، ہمیں احساس ہے کچھ امن مخالف قوتیں ”اسپائیلرز”کا کردار ادا کرنے کیلئے متحرک ہیں،ماضی کی غلطیوں سے سبق سیکھنا چاہئے۔ جمعہ کوافغانستان کی موجودہ صورتحال کے حوالے سے وزیر خارجہ مخدوم شاہ محمود قریشی نے کہاکہ افغانستان کی بدلتی ہوئی صورتحال پر سب کی نظرہے،سب افغانستان میں امن و استحکام چاہتے ہیں۔ انہوںنے کہاکہ کوئی بھی افغانستان میں خونریزی نہیں چاہتا،سب چاہتے ہیں کہ افغان طالبان اور سابقہ حکمران سب مل بیٹھ کر ایک ایسا سیاسی ڈھانچہ تشکیل دیں جس میں سب کی شمولیت ہو ـجو سب کیلئے قابلِ قبول ہو تاکہ معاملات معمول کی جانب بڑھیں۔ انہوںنے کہاکہ افغانستان سے پر امن انخلاء کے حامی ہیں،پاکستان اپنا مثبت کردار ادا کرنے کیلئے پر عزم ہے، کابل میں تعینات ہمارے سفیر کے بھی مختلف شخصیات کے ساتھ روابط ہو رہے ہیں۔ انہوںنے کہاکہ پاکستان آئے ہوئے، افغان وفد کی میرے ساتھ اور وزیراعظم عمران خان صاحب کے ساتھ ملاقات اور تبادلہ خیال ہوا ہے،سب امن کے خواہاں ہیں۔
