اسلام آباد (این این آئی)وفاقی وزیر آئی ٹی سید امین الحق سے پاکستان میں متحدہ عرب امارات کے سفیر حامد عبید ابراہیم الذابی نے ملاقات کی جس میں باہمی دلچسپی کے امور، کینکٹوٹی اور اسپیکٹرم آکشن کے حوالے سے گفتگو کی گئی ،فریقین نے آئی ٹی و ٹیلی سیکٹر میں تعاون بڑھانے پر اتفاق کیا ہے۔وفاقی وزیر سید امین الحق نے کہاکہ پاکستان متحدہ عرب امارات کے ساتھ تعلقات کو بڑی اہمیت دیتا ہے، دونوں ممالک کے درمیان مختلف میدان خصوصا آئی ٹی و ٹیلی کام سیکٹر تعاون کو وسعت دینا بہت اہم ہے۔ وفاقی وزیر نے کہاکہ آئی ٹی برآمدات کے اضافہ کیلئے کوشاں ہیں، گزشتہ مالی سال میں ہماری آئی ٹی برآمدات میں 47.43 فی صد اضافہ ہوا۔ وفاقی وزیر نے بتایاکہ پاکستان متحدہ عرب امارات کے ساتھ آئی ٹی برآمدات میں مزید اضافہ کا خواہاں ہیں، 16 ستمبر کو ایڈیشنل اسپیکٹرم کی نیلامی ہونے جا رہی ہے۔ امین الحق نے کہاکہ ملک میں ٹیلی کام سروسز کی موثر انداز میں فراہمی کے لیے بھرپور اقدامات کر رہے ہیں۔ سفیر حامد عبید الراہیم نے بتایاکہ متحدہ عرب امارات کے پاکستان کے ساتھ مضبوط اور برادرانہ تعلقات ہیں، پاکستان کے ساتھ ٹیکنالوجی کے میدان میں مکمل تعاون کریں گے۔ انہوںنے کہاکہ آئی ٹی و ٹیلی کام سیکٹر کی ترقی کے لیئے وزارت آئی ٹی کے اقدامات قابل تحسین ہیں ۔متحدہ عرب امارات کے سفیر نے وفاقی وزیر آئی ٹی سید امین الحق کو دبئی میں 22 تا 23 نومبر کو ہونے والے ”گلوبل مینوفیکچرنگ اینڈ انڈسڑیلائزیشن سمٹ”میں شمولیت کی دعوت بھی دی۔ وفاقی وزیر آئی ٹی نے دعوت قبول کر لی۔ملاقات میں وزارت آئی ٹی کے سینئر افسران بھی موجود تھے۔
