لاہور( این این آئی)نامور اداکارہ فضیلہ قیصر نے کہا ہے کہ میں ہمیشہ سچی اور کھری بات کرتی ہوں او رمجھے اس کا ذرا بھی خوف نہیں ہوتا ، میاں بیوی کو ایک دوسرے کے ساتھ سمجھوتہ کرنا پڑتا ہے تبھی زندگی کی گاڑی آگے چلتی ہے ۔ ایک انٹر ویو میں فضیلہ قیصر نے کہا کہ میری ڈکشنری میں ہاں یا ناں ہے درمیان میں کچھ نہیں ،ہر کسی کی اپنی شخصیت ہوتی ہے لیکن میرے خیال میں انسان کو ایسا ہی ہونا چاہیے کہ وہ سچی اورکھری بات کرے اور اسے کوئی ڈر اورخوف نہیں ہونا چاہیے ۔ انہوںنے کہا کہ انتہائی مطمئن اور خوبصورت ازدواجی زندگی گزاری ہے۔ میاں بیوی کو ایک دوسرے کے ساتھ سمجھوتہ کرنا پڑتا ہے تبھی زندگی کی گاڑی آگے چلتی ہے ۔ میاں بیوی میں نوک جھونک ہو جاتی ہے لیکن اسے طول نہیں دینا چاہیے ۔ ضروری نہیں کہ بیوی ہی معذرت کرنے یا منانے میں پہل کرے مردکو بھی ایساکرنا چاہیے اور اس میں کوئی برائی نہیں ہے ۔ انہوںنے کہا کہ شادی سے پہلے میاں بیوی دو الگ گھروں سے وابستہ ہوتے ہیں ، ان کی اپنی سوچ اور شخصیت ہوتی ہے اس لئے شادی کے بعد دونوں کو سمجھوتہ کرنا چاہیے تبھی معاملات آگے چلتے ہیں۔
