اسلام آباد (این این آئی) اسلام آباد میں ایک تاریخی اور اہم کانفرنس کال وفاقی وزیر وزارت میری ٹائم افیئرز علی حیدر زیدی اور انٹرنیشنل میری ٹائم آرگنائزیشن (آئی ایم او) کے سیکریٹری جنرل کتیک لم کے درمیان منعقد ہوئی۔ وفاقی سیکرٹری برائے وزارت بحری امور رضوان احمد، برطانیہ میں پاکستان کے ہائی کمشنر معظم خان ، آئی ایم او میں پاکستان کے میری ٹائم کوآرڈینیٹر کیپٹن محمد شفیق اور آئی ایم او کے دیگر حکام نے بھی اجلاس میں شرکت کی۔ آئی ایم او کے سیکریٹری جنرل نے حکومت پاکستان کی جانب سے وزارت میری ٹائم کے ذریعے کیے گئے اقدامات کی تعریف کی۔ انہوںنے کہاکہ پاکستان کی شراکت داری کا ہمیشہ شکر گزار رہا ہوں جس پر وفاقی وزیر نے ان کا شکریہ ادا کیا اور بندرگاہوں پر ماحول اور موثر انتظامی کنٹرول سسٹم کیلئے اپنے عزم کا اظہار کیا۔ انہوں نے کہا کہ پاکستان آئی ایم او کے ساتھ تعلقات کو بہت اہمیت دیتا ہے۔ پاکستان 1958 میں آئی ایم او میں شامل ہوا اور اس معزز فورم کے ابتدائی ارکان میں سے ایک ہے۔ وفاقی وزیر علی زیدی نے سیکرٹری جنرل کو مضبوط اور جارحانہ سمندری جہاز رانی کی پالیسی سے آگاہ کیا جو ٹیکس اور ڈیوٹی میں چھوٹ فراہم کرتی ہے اور غیر ملکی جہاز رانی کو پاکستان میں سیٹ اپ آپریشنز کی ترغیب دیتی ہے۔ وفاقی وزیر نے اس اہمیت کے بارے میں بھی تفصیل سے بات کی جو پاکستان سمندری مسافروں کو دے رہا ہے۔ انہیں ”فرنٹ لائن سپاہی”قرار دیتے ہوئے انہوں نے سیکرٹری جنرل کو آگاہ کیا کہ پاکستان نے سمندری مسافروں کو آئی ایم او کے رہنما اصولوں کے مطابق ”کلیدی کارکن”قرار دیا ہے۔ انہوں نے کہا کہ ان کے تمام ڈیٹا کو ڈیجیٹل کر دیا گیا ہے جس کے نتیجے میں ان کے ویزا حاصل کرنے کے عمل کو تیز رفتار سے ٹریک کیا جاتا ہے۔ وزارت سمندری امور کی طرف سے بڑے پیمانے پر مینگروو پلانٹیشن ڈرائیو کا ذکر کرتے ہوئے وفاقی وزیر علی زیدی نے وزیراعظم عمران خان کے کلین اینڈ گرین وژن کے بارے میں تفصیل سے بات کی۔ انہوں نے بتایا کہ وزیر اعظم نے خود گزشتہ ماہ مینگرووز لگائے تاکہ ماحول کے تحفظ کی اہمیت کو علامتی طور پر اجاگر کیا جا سکے
