لاہور (این این آئی) مسلم لیگ(ن)پنجاب کی سیکرٹری اطلاعات عظمی بخاری نے کہاہے کہ پنجاب میں چینی،گندم ،سبزیاں وافر مقدار میں موجود ہیںلیکن حکومتی سرپرستی میں مافیا نے تمام خوردنی اشیاذخیرہ کی ہوئی ہیں۔اپنے بیان میں انہوںنے کہاکہ مارکیٹ میں سوچی سمجھی پلائننگ کے تحت چینی،آٹے اور دیگر اشیاکی قلت پیدا کی جارہی ہے۔عثمان بزدار کے کچن میں تلور اورغریب کے کچن میں دال بھی نہیں پک رہی،علیم خان کے استعفے کے بعد خوراک کا محکمہ لاوارث ہے۔ڈیڑھ ماہ سے پنجاب کا کوئی وزیر خوراک نہیں ہے۔عثمان بزدار اور انکی 46رکنی کابینہ عوام کی غربت کا مذاق اڑارہے ہیں۔چھ ماہ سے پنجاب میں پرائس کنٹرول کمیٹیاں غیر فعال ہیں۔پچاس مجسٹریٹ کا کام جب دو مجسٹریٹ سے لیا ائے گا تو منافع خور کیسے قابو میں آئیں گے۔انہوںنے کہاکہ جادو ٹونے سے صرف کرسی بچ سکتی ہے مہنگائی کنٹرول نہیں ہوسکتی۔عثمان بزدار جیسا بوجھ اب پنجاب مزید برداشت کرنے کی سکت نہیں رکھتا۔
