کراچی(این این آئی)وزارت صنعت و پیداوار نے اسٹیل مل کے ٹرانزیکشن اسٹرکچر پر اعتراضات اٹھا دیئے ہیں، جس میں ادارے کی قیمتی اراضی دیگر صنعتوں کو دینے کی تجویز بھی شامل ہے ، دریں اثنا اسٹیک ہولڈرز گروپ کے کنوینر ممریز خان نے کہاکہ اسٹیل مل کے ٹرانزیکشن اسٹرکچر میں ملازمین اور ادارے کے دیگر اسٹیک ہولڈرز کے مفادات کا خیال رکھنے کے بجائے من پسند افراد کو نوازنے کی کوشش کی جارہی ہے ۔تفصیلات کے مطابق نجکاری کمیشن کی جانب سے اسٹیل مل کیلئے تشکیل دی گئی ٹرانزیکشن کمیٹی نے اسٹیل مل کی زیر نگرانی ایک ذیلی کمپنی بنا کر ادارے کے تمام معاملات اور اثاثہ جات اس ذیلی کمپنی کے سپرد کرنے اور بعدازاں اکثریتی حصص مذکورہ نئی ذیلی کمپنی کو فروخت کرنے کی تجویز پیش کی ہے جبکہ دوسری تجویز میں ادارے کو 30سال کی رعایتی/لیز پر نجی شعبے کو حوالے کرنے کا کہا گیا ہے
