اسلام آباد (این این آئی)نیشنل ڈیفنس یونیورسٹی اسلام آباد کے شعبہ گورنمنٹ اور پبلک پالیسی سے تعلق رکھنے والے طلبہ و طالبات کے70 رکنی وفد نے اپنے فیکلٹی ممبر ان کے ہمراہ افشین ذیشان کی سربراہی میں پارلیمنٹ ہاؤس کاسوموار کو دورہ کیا۔ ایوان بالاء کے اعلیٰ حکام نے وفد کو پارلیمنٹ ہاؤس میں خوش آمدید کہا اور وفد کو سینیٹ ہال اور سینیٹ میوزیم کا دورہ کرایا گیا۔ سینیٹ حکام نے پارلیمنٹ ہاؤس کا دورہ کرنے والے وفد کو ایوان بالا کے کام کے طریقہ کار، قانون سازی اور فنکشنز بارے تفصیلی آگاہ کیا۔ وفد نے چیئرمین سینیٹ کا شکریہ ادا کرتے ہوئے کہا کہ اْن کے دورے سے انہیں موثر معلومات ملی ہیں اور پارلیمان کے طریقہ کار کو سمجھنے میں آسانی ہوئی ہے۔
